我的奶媽之路

打從 Bingo 開始，就要為各項 BB 用品煩惱。其中「食」係一個頗頭痛嘅問題，因為大家都知之前國內同胞搶奶粉搶得好犀利，初生 B 都唔知點算好。我從來冇諗過可以餵人奶呢樣嘢，或者因為之前媽咪湊嘅兩個 BB 都係奶粉 B，根本對人奶完全冇 concept，亦唔醒起原來 BB 係可以食人奶 (笑)。

每日上 BK 都總會見到有關人奶嘅各項問題，我先開始去了解下餵人奶究竟係咩一回事。各方好友都同我講咗，人奶媽之路並非想像中容易。

 --- 初生 BB 唔知自己要食幾多，完全係 feed on demand，即係話佢喊就要比佢食，正常 BB 個幾兩個鐘就扭食一次，一日 24 小時，即係話閒閒地一日要餵 10 - 12 餐，non-stop 地餵，包括人人都熟睡中嘅半夜時間。。。狀況會維持兩個月左右，視乎 BB 進度，即係話兩個月冇得 zzZZZ。

-- 初生 BB 同埋媽媽仍在學習究竟點樣嘅吸啜姿勢先會令到兩位都舒服？BB 初時唔識食，咬損媽媽乳頭係等閒事。損晒流晒血都仲要堅持餵，試問自己又做唔做到？

-- 萬一 BB 百厭只顧訓覺唔願啜，但又唔肯放口，個胸谷住谷住有供無求，導致乳腺炎發燒，我仲堅唔堅持到落去？日日都孭住兩舊石頭做人，我又可以嗎？個胸硬到谷到上頸，掂一掂都痛，個個都話好辛苦，對住 BB 喊晒，到時我又點呢？

雖然我已經有心理準備知道人奶媽唔易做，不過記得某一次返健康院聽一個母乳講座，姑娘解釋點解要餵人奶代替奶粉，佢拎咗一份母乳嘅營養表，總共要 5 張 A4 紙先寫得晒，一張一張貼起上嚟足足一個人咁高。相反奶粉嘅營養表只係得一張 A4 紙，唔知點解呢一幕印象好深刻，原來奶粉一直只係模仿母乳嘅營養，牛奶始終係比牛飲，人仔食人奶點都唔會錯啦~ 之後就諗..... 兩者嘅營養相差九條街，而且人奶 B 係一定會比奶粉 B 健康，腦部發育都好 D，對媽媽同埋 BB 身體又好 D，既然大部份嘅女性根本可以餵人奶，點解唔試下？當係一個新手媽媽送比 BB 一份有用而且終生受益嘅禮物！故此我就開始為我嘅人奶媽之路好好鋪路。。。

世衛建議 BB 頭 6 個月全人奶，6 個月後可以食固體，如果媽媽堅持到，最好就食到小朋友自然離乳 <-- 呢樣我冇乜信心。題外話：原來世衛唔比廣告商宣傳 0-6 個月嘅奶粉，所以見到雅培呀、美素佳兒呀、雀巢呀，全部都冇 0-6 個月嘅奶粉廣告。

我暂時嘅目標係餵頭 6 個月人奶，之後視乎阿 B 食固體進度 + 自己嘅意願先再作打算。

做人奶媽，放產假時都冇咩嘢要預備，只係預備幾個哺乳胸圍 + 哺乳衫。後者已經喺淘寶買咗數件，如果放產假時主要留喺屋企，其實著唔著哺乳衫都唔係大問題。至於前者，打算等差不多生得先去買，因為過多 1-2 個月應該會再度發育，嘻嘻。

到差不多放完產假，復工後就要改行做泵媽。泵媽要預備嘅物品就多好多。

1) 奶泵

話到明泵媽，一個可靠嘅奶泵又點少得？了解我嘅朋友都知道我份工係超 hea 的。話說有一日我無聊到極點，可以上嘅網站都比我上晒，唔知做咩好就走去人哋 8 月媽媽版睇下人哋將會遇到咩問題，到發生喺自己身上都知道係咩一回事。點知發現有 8 月媽媽報料話喺 amazon uk 買 medela swing maxi 雙奶泵比香港平一半。本來我仲 15/16 中，打算等 BB 出咗世自己係咪真係成功做到人奶媽先決定買唔買奶泵，但係 search 過呢個牌子係超多人奶媽激讚，最終都比呢個優惠深深地吸引...... 得到歐陽生支持，二話不說，買了！上星期已收到貨添~~

特價特價，究竟點特法？
以我所知，一般舖頭賣緊 $3,XXX，宜家喺 amazon UK 訂連埋運費寄到嚟香港只係 111.31 英磅，折合港紙 HK$1,366，你話係咪平成半？咁心動嘅價錢點可以唔買？加上 medela 一向有 fans，萬一、如果、可能、或者我做唔成奶媽，原價放返出去應該都冇問題啩？最令我心動係.... 我本身打算買 Avent 單電泵，呢隻賣緊千鬆 D，我點解唔加多 $1xx-2xx 買個雙泵？又快 D，又靜D。

拆禮物時間永遠都係最開心的，收咗咁多樣 BB 物品，終於有一樣係屬於我架啦！

我冇數過 D 配件齊唔齊，只係睇過有冇損壞。而且聽 D 媽媽講 youtube 有教學片教你點砌泵，我呢 D 懶人未到用嗰一刻當然都唔會郁手住啦。

完成圖應該係咁！
希望 medela swing maxi 唔會令我失望啦！

上網買一定屬於水貨，幸好仍然可以拎去香港代理檢查維修，但水貨就要支付檢查維修費，相反行貨就免費檢查。

2) 儲奶袋

唔知幾時開始，身邊好多朋友都去泰國旅行，今年興去泰國咩？布吉啦、曼谷啦、芭堤雅啦，陸陸逐逐有同事朋友出發。
亦唔知幾時開始，我收到嘅泰國手信全部都係 Boots 儲奶袋，到目前為此我已經收到 10 盒啦。一盒 60 個，呢度有 600 個，hahahaha



希望我唔會辜負大家對我做奶媽嘅期望，我會努力做好呢份工！儲奶袋有幾多要幾多，但求阿 B 喺我返工期間唔使憂柴憂米無得食！

3) 羊脂膏

上面都提過，基本上比 BB 啜損乳頭幾乎係每個人奶媽必經之路。暫時未經歷過，所以未能理解當中嘅痛楚。不過聽其他人奶媽咪喺 BK 分享，聽母乳講座，從佢哋嘅文字或者演講時嘅表情可以預計到非常痛。喺乳頭冇得休息底下仍然要比阿 B 一日食 10 - 12 餐，真係要有相當嘅忍痛能力至得。想唔好整損，除咗要識得正確嘅餵奶姿勢外，一支羊脂膏看門口係不可缺少。

 

呢支羊脂膏只係 7.4 oz，超細支。。。但係已經要賣 HK$7X，作為精打細算嘅我，近排喺 BK 二手市場收咗支全新嘅返嚟，expiry date 係 2015 年 3 月，包埋郵費 HK$40，成交！希望阿 B 錫住我，我唔洗點出動到呢支藥膏啦~

另外仲要預備埋藍冰、冷凍袋等等。藍冰已經有一舊，N 年前喺日本城買，冷凍袋就要再做下功課先。希望我都可以成功踏上奶媽之路，將最好嘅嘢送比我嘅寶貝囡。

Jusco 第二次血拼

2013 年 5 月 17 日 (星期五)   21W6D

我嘅血拼同人哋嘅血拼相差好遠，拼完返嚟 show 下戰利品，一 d 豐富嘅感覺都無，哈哈。

不過我絕無留手，只係將 D BB 用品分開日子買，感覺上每次都買得唔多。但係呢度又用咗我差唔多 7 百幾啦，仲有一 SET 床上用品未上鏡，嗰 set 用品又 4 舊，埋單 around $1,100。

買嘢方法依舊，上次仲有 D $30 coupon 淨低，今次樣樣嘢都計到 $300 cut 一張單，務求折到最平。。。。

1) Nuk 消毒奶瓶器（原價 $480，折後 + coupon $402）<-- 呢個真係全城至抵.....
2) Casablanca BB 床上用品 12 件套裝（原價 $479，折後 + coupon $401）
3) BB 初生蝴蝶袍 x 2（原價 $89.9，折後 $80.9）<-- 買完先知原來喺百貨公司買 BB 衫係好笨嘅一件事呢，貴到九彩
4) Minimoto 紗巾共 8 條（原價 $33.1，折後 $29.7）
5) BB 車掛勾（原價 $43.2，折後 $38.8）
6) Nuk 初生指甲鉗（原價 $17.1，折後 $15.3）
7) 嬰兒專用棉花棒（原價 $ 21.3，折後 $19.1）
8) 思詩樂乾棉（原價 $57 兩包，折後 $51.2，仲要係增量裝，平過護協好多呀）

買埋呢次，其實好多嘢都買得 7788，仲有少量嘅日用品例如尿片、濕紙巾、產婦 M 巾呢 D 未買。怕太早買 D 濕紙巾會乾晒，尿片嗰 D 又會因為天氣潮濕搞到嗰 D 咩咩尿濕指示會變晒色用唔到。

自從 Bingo 之後，對 BB 用品都做咗好多資料搜集，完全不能理解點解以下呢兩樣嘢會貴到離晒大嫂...... 偏偏我又向現實低頭買咗 XD

(1) Karibu 摺疊浴盆

係，不得不承認呢個盆摺埋之後真係勁慳位，亦不得不承認香港地 D 樓真係寸金尺土。如果我屋企有成千呎咁大，我就唔洗買呢個浴盆，買返個最古老嘅紅 A 塑膠盆幫 BB 沖涼，哈哈~

呢個 Karibu 摺疊浴盆，承惠 $4XX。搵到最平嘅一間 BB 用品店有得賣，但係個價錢都吾講得笑，平極都要 $394。我自己買一個之餘，由於娘家空間亦有限，我都要買多個比媽咪，兩個浴盆就洗咗差不多 $800 啦~

(2) Combi 4 ways 揹帶

所謂嘅 4 ways，其實只係多多一個功能，就係可以 for new born 平揹出街就得。

偏偏就唔明白，平時 d 3 ways 揹帶最貴都只係 5 百幾，多 1 way 啫...... 價錢升到 $1,288。眼都突埋，一條揹帶要過千？鑲金架？有一次同老爺奶奶傾開計知道我哋打算用揹帶，佢哋就好熱心幫我周圍格價，最終佢哋靜雞雞買咗比我哋話送比 BB。我知應該唔平，不過佢哋點都唔肯講幾錢，淨係話行過荃灣愉景新城做緊特價，唔貴唔貴~~~ 我 search 過，就算樓上舖都要賣 $1,088，雖然唔係我哋出錢，但係都戥佢肉赤....... 成千蚊一條揹帶......... 成千蚊一條揹帶.........

BB 呀 BB，你是幸福的~~~
喺我公佈咗做蛇媽媽之後，短短兩個月已經收到來自四方八面嘅禮物仔，大個咗要逐一多謝各位呀！

 

照結構 @ 20W2D

2013 年 5 月 6 日 (星期一)

過幾日就係自己生日啦~ 一直都 plan 好咗生日嗰個星期去做結構檢查，當係送比自己嘅一份禮物。

其實照結構嚟講對我係一個大關卡，因為 touchwood 如果照到 BB 有咩缺憾的話，要決定 BB 嘅去留..... 不過我哋對歐陽小 B 有信心！

當日約咗黃醫生 10 點，我哋冇早冇遲就到咗診所。

先做一輪初步檢查，離不開都係量血壓、心跳、磅重。血壓同埋心跳一直係我比較 concern 嘅問題，因為自從個肚入面多咗個 BB 之後，好明顯 feel 到自己嘅心跳快咗好多。之前覆診曾經試過心跳去到一份鐘 100 下，我自己都打咗個突，不過姑娘竟然話正常。今次嘅 result 比較合理 D，血壓 11X / 7X，心跳每分鐘 8X 下（隔咗太耐先打　blog 已經唔記得實際數字 XD)。

等咗大約 15 分鐘左右就輪到我睇，醫生首先解釋做結構係結構上嘅檢查，包括睇心臟、腎、左右心房、左右心室、數手指腳指、睇有冇兔唇、頭圍、肚圍、大脾骨、耳仔長等等好多樣嘢。不過結構照唔到嘅地方又唔代表佢出世係一切正常，其實我之前做資料搜集都略知一二，不過呢 d check up 點都要做。

今次一照，BB 嘅姿勢係將自己身體完全對摺，難度係 9.9~~~ 不過醫生話冇問題，照樣可以照到佢要照嘅嘢。

當中照咗好多嘢，不過我一一唔記得，只係記得醫生話呢個係咩，正常吖，呢個係咩，正常吖，再 confirm 多次係 baby girl。仲有小 B 嘅腳板仔，齊晒 5 隻腳指，kawaii 呢！

之前喺網上睇 d post 又話照結構係會有 4D 睇到 BB 個樣，不過原來黃醫生話 4D 純綷真係睇樣，冇咩 function。如果結器官，點都係用 2D。不過佢都循例會開下 4D 比準父母開心下嘅~

今次 BB 好合作，未至於識得望鏡頭，但係睇到正面~



黃醫生話歐陽小 B 咀細細，面尖尖，但係佢個大鼻就逃唔過我同歐陽生嘅法眼..... 呢個大鼻妹，似足佢爸爸!!! 不過放心，既然醫生話大鼻妹面尖、咀細、腿長，有齊晒美人胚子嘅條件，我呢個阿媽會盡力同佢搓返尖個鼻，唔會 side 咗佢嘅 potential 嘅，wakakaka！

最後醫生唔知點解幫小 B 對腳影埋 3D 相送比我，或者佢想驗證下阿 B 真係有長腿啩？

照咗大約 15 分鐘左右就照完啦，承惠 $1,200。

臨尾黃醫生問我哋有冇興趣下一次返嚟覆診時照一次 4D (啱週數) + 正常產檢，4D 可以將 BB 喺我肚入面嘅情況錄起，燒落隻 DVD 比我做紀念，承惠 $900。老實講，佢呢個價錢算係平，嗰一刻有心動過一下，因為所有有關歐陽小 B 嘅嘢我都想留念。不過同歐陽生商量過，其實 4D 真係 0 作用，純綷睇佢嘅活動情況，不如將照 4D 嘅錢用喺第二度仲好。諗諗下都不無道理，況且今次照結構 BB 面向鏡頭，醫生已經比咗幾張寫真我，咁又好似真係冇需要再照 4D。咁好啦~ 唔 side $$$$ 啦！

恭喜歐陽小 B 又過一關，宜家唔敢講可以安安靜靜等佢出世，因為我相信仲有好多難關等緊我哋同 BB，不過我控制唔到嘅就唯有平常心面對。我仍然都係嗰句，唯一心願就係 BB 可以順利出世，睇住佢健健康康咁長大！

百日倒數 @ 25W5D

2013 年 6 月 13 日 (星期四)

今日係 6 月 13 日，無無聊聊數下日曆，原來距離預產期 9 月 21 日得返啱啱 100 日啦！本來都唔緊張，一諗起得返 100 日就莫名奇妙地驚驚地。

自從踏入 23W 起，肚子一直徘徊喺 33 - 34" 左右，直至今日 25W5D 都係冇大過。出奇地去做產檢時 BB size 係有增長，而且仲符合週數。咁..... 我個肚又冇乜點大，而 BB 又有增長，佢增長嘅空間喺邊度嚟？唔會壓住我 D 內臟啩？

註：由於是日有 D 樣衰，就一於惡搞一下自己。(攝於公司洗手間)

肚子雖然圓圓地，但仍然 keep 住喺 34" 左右。其實肚細都未尚唔係一件好事，生完修身可以快 D、冇咁容易爆肚紋 (touchwood 暫時一條紋都未有)、健步如飛 (係上落樓梯或斜路會變阿婆 mode)，只要 BB size 正常就得啦。

倒數 100 日，意味住我就快可以重獲自由 (當然係 refer to 食嘢方面)。知道自己已經進入大直路，近來腦海都浮現好多重獲自由後必做嘅事，唔知有冇可能實現到呢？

- 不顧後果地食薯片、朱古力、蝦條、雪糕、各式各樣嘅零食，熱氣都唔洗怕，可以飲涼茶，食龜靈膏

- 日日唔係飲凍檸茶就係咖啡 (呢兩樣真係戒咗好好好耐，每次見到歐陽生飲凍檸茶都總會偷佢幾啖嚟飲)

- 生蠔、蝦、蟹、所有嘅海鮮 (包括甲殼類)...... 我嚟啦~~~

- 各款魚生、刺身、海膽.... 可憐嘅我早排食生日飯及母親節飯去食放題，只可以喪食蟹柳及玉子壽司。眼見人哋大啖大啖三文魚，都咪話唔傷心。

- 各款禁咗好耐嘅生果，如芒果、菠蘿、提子 (至愛)、香蕉、荔枝、龍眼等等..... 數之不盡

- 唔好以為蔬菜類就唔洗戒口，乜瓜物瓜都列為違禁品，因為中醫話所有瓜類都係涼喎

- 糖水.... 終於唔洗再禁足糖水舖啦!!! 楊枝金露、綠豆沙、芝蔴糊、綿綿冰、涼粉、蕃薯糖水、薑水湯圓，哇.... 數唔晒呀

- 行街時口渴可以飲貢茶；口痕時可以食 frozen yogurt + 雪糕，唔洗宜家全部都係清水，清水，清水

- 終於唔洗日日食烚雞蛋 + 高鈣低脂鮮奶，老實講，我到後期開始討厭烚蛋，食到尾永遠都唔想吞

- 高興時仲可以飲返杯紅酒添呀

***********************************************************************************************

除咗食嘢方面，以下嘅嘢我都好想好想可以實現到：

- 重回跳舞之路，不過做咗人哋媽媽，點都會阿 B 大過天。一星期會跳 1 日，最多兩日，可以快 D 修身之餘唔想再行樓梯會索晒氣

- 唔知可唔可以一覺訓天光 (屋企多咗隻 B，應該都冇乜可能)

- 可以自由地剪腳甲 (宜家比個肚頂住，呢項任務要暫時由歐陽生負責)，連著袜都有困難

- 可以做返 gel 甲，搽下腳甲油扮靚靚

- 出街可以化返妝，宜家成個阿嬋咁

- 可以趴喺床度訓 / 睇書 / 玩電話

- 做 facial 時可以按肩頸，宜家唔得..... 因為肩頸有個唔知乜乜穴，唔小心按到會宮縮

- 好想去旅行..... 太多朋友去咗旅行.... 暫時只可以喺 FB 度羡慕大家

暫時諗到咁多，BB 你要乖呀，我為咗你嘅健康著想真係戒咗好多我至愛嘅嘢，雖然我好想做到以上嘅事，不過你唔洗趕住出世成全我架，乖乖地住滿 38W 先出嚟同大家 say hi 啦！