我有嘢講

咳咳.....
尋晚終於向一位好好好好嘅朋友 -- 小高親口公佈咗喜訊，
我之前寫落嘅「大少奶孕記」幾篇 blog 終於可以 open to public 啦！

冇錯，我係蛇年嘅 mum-to-be 呀，預產期 9 月底，係名副其實嘅「生蛇」呀！
之前有打算生龍 B，不過見勢色唔對（事關太多龍 B 啦），為免第時爭呢樣爭嗰樣，我放棄咗...
既然生肖對於我嚟講唔係一個問題，我倒不如揀一個冇咁旺嘅生肖仲好啦，
我舒服時 BB 又舒服。

一直都期待咗尋晚好耐啦！
尋晚係我、歐陽生、Ci Ci、王生、小高、主任一齊睇 Aaron 演唱會嘅日子，
適逄我已經 3 個半月，就一於揀呢日同小高公布啦，wakakaka
之前老公已經想喺 FB 公布，好彩比我叫停，
我話一定要等小高知道咗之後先可以對外公佈，
我唔想佢要睇 FB / blog 先知道呢個消息！

唔..... 其實今次 bingo 咗，一半係意外，一半係計劃中，
計劃中就係一直都打算今年不設防試要 BB，
意外就係佢早咗嚟囉~ 不過冇所謂，呢 d 係緣份，多謝上天賜咗份咁好嘅禮物比我哋。

意外.... 係因為細佬喺 12 月關島註咗冊，嚟緊星期五喺香港補擺酒。
一直都打算等佢完成埋擺酒先正式試要 BB，
不過我就諗，佢註完冊，有 3 個月嘅 cycle，我唔中都好正常吖，
始料不及就係 12 月時就一擊即中，或者真係冇壓力時反而係最大機會 bingo。
細心嘅仲會發現我喺關島一次過買咗兩樽葉酸，
可想而知我真係冇諗過咁快 bingo。

直至今日我已經 14W1D，其實應該已經會知道性別架啦，
不過醫生比咗 4 月頭個期我去覆診，所以未有機會照超聲波。
覆診時應該係16W，點都會睇到架啦。

如果問我，其實我仔女都冇壓力，因為奶奶自己都恨女，所以佢自己都生咗三個，可惜全男班。
而我老爺更加恨女恨到發燒。
至於媽咪.... 佢更加冇所謂，總之佢有孫湊就開心~

好，留返 d 時間整整之前嘅孕記 blog，仲有 BB 嘅玉照（定係肉照）？

細佬成婚之旅 --- 關島 @ Day 3

3 月真係我工作上最忙嘅月份。我公司每逢 3 月出業績，終於捱過咗日日 OT 嘅日子，之前真係忙到天昏地暗，連 blog 都寫唔切。其實到宜家都仲未完成，不過等緊人哋交嘢比我，一於趁呢個空檔期寫返關島 trip Day 3 先，拖得太耐我就唔記得當日食咗／玩咗 d 咩架啦！

2012 年 12 月 13 日 (星期四)

 

尋日見證咗一對有情人終成眷屬，今明兩日就要玩盡佢啦。今日嘅活動主要係水上為主，go go go~

我哋今日 join 咗個 tour，上午先去睇海豚 + 浮潛，下午再去 ABC Club 玩一系列嘅水上活動。所以晨早就有 guide 嚟到酒店大堂接我哋啦，我哋就係坐呢架車出發。

一上到車，大家都掛住搽防曬，個場景真係好好笑。

去到碼頭，個海一望無際。。。不過呢幾年去旅行太多海水啦，今年，今年一定要去一趟同海水無關嘅地方，如無意外應該都係日本架啦！



到咗碼頭，領隊先帶我哋去 ABC Club，安排好每人一個 locker 存放私人物品，只係帶落水嘅東西跟身。搞掂好先上船，準備出海浮潛。

到咗目標地方，先係有得玩香蕉船，不過我想講呢隻香蕉船真係 hea 到無朋友，完全就咁被隻大船拖住嚟行，一 d 驚險嘅情節都冇，仲安全過坐車呀！所以連我媽咪平時咁細膽嘅人都玩咗兩次，可想而知隻香蕉船有幾穩陣！





完咗香蕉船呢個環節，大家可以落水浮潛，我哋做後生嘅真係二話不說就換衫，帶好成副裝備跳落海。



而四位長老可能對自己無乜信心，所以決定留喺船上面幫大家影相。



其實海入面有好多魚仔架。我哋都特登買咗部防水相機去，不過好白痴咁留低咗喺 locker 唔記得帶出海。幸好歐陽生部手機有防水功能，可惜都唔係影得好清楚，呢一幅已經係最清楚嘅一幅啦。

我估計只係大約潛咗半個鐘左右就要上返船。因為準備駛去另一個地方睇海豚，yeah！
其實呢，我好鐘意海豚架，尤其是海洋公園最常見灰色嗰種，香港嗰 d 中華白海豚我覺得好醜樣，hahaha！

我哋梗係唔執輸，知道到去睇豚，第一時間守住喺甲板。Feel 到隻船熄咗引擎就知道到咗海豚出沒嘅地方啦～～～


船家話基本上嚟 10 次有 10 次都睇到海豚，如果咁不幸睇唔到，證明你當日真係地獄黑仔王！

睇完咁 kawaii 嘅海豚之後，我哋就駛返埋去 ABC Club 食 lunch 醫肚先。

不過留喺甲板真係好舒服，我哋幾隻嘢仲走去搞住船長，wakakaka



離開隻船之前影返張相



好，開餐！

其實唔好奢求呢 d tour 會有好豐富嘅美點招呼自己，我嘅宗旨但求醫得飽個肚，唔會難食到嘔就 OK 啦。不過出奇地個炸雞又幾好食喎！


食完飯，其實整個下午都係留喺 ABC Club 玩不同嘅水上活動。

有水上電單車，划艇，出深海區浮潛，sea walking，空中梳化，水上單車等等。只要喺個海上面唔用電嘅活動都係免費。

呢個時候梗係推介父母玩水上單車啦（自己踩嗰種），等佢哋可以懷緬下以前拍拖嘅 moment 嘛。

搞掂咗佢哋，我哋就各有各玩 lu。不過竟然掛住玩唔記得影相，呢一 part 一張相都無。

玩到 4 點幾係時候要跟車回程。

回程時見到 Fish Eye，下次有機會再嚟關島一定要去下 Fish Eye，聽講唔會比 ABC Club 輸蝕喎。



返到酒店，大家都話既然整濕咗個身，唔好浪費去埋酒店個泳池游下水。所以有一千零一張我嘅泳照，隱約都見到有少少腹肌，可能係跳舞 warm up 時做 sit up 嘅成績，hohoho

玩咗一陣，其實大家都攰啦。所以陸續都上房梳洗，準備今晚 6:30 開始嘅 Fiesta BBQ Buffet。

BBQ Buffet 喺返酒店嘅 outdoor 地方進行，唔洗四圍走，弟婦真係諗得週到。今日玩到咁攰，如果要大家再行出去食飯，可能返嚟得返半條人命。

去到安頓後立即開動。

嘩，都幾多嘢食喎！D 蝦幾大隻！！！

而且仲有大大隻嘅生蠔，歐陽生食得好滋味！睇下右上角，一隻碟只可以裝得落兩隻蠔，可想而知個 size 有幾巨形。

當晚都算座無虛席架



呢張相可能真係好肉麻，不過無乜機會睇到呢對孖寶咁 sweet，肉麻都要 post 出嚟

除咗肉麻照當然唔少得齊齊整整嘅大合照啦！

呢個 BBQ Buffet 除咗食物同埋氣氛出名之外，其實以下呢一 part 都好出名架。因為會有 D 本地人跳「查莫洛民族舞」娛樂大家。到咗最尾仲玩火添呀。

對於一般遊客嚟講，當晚高潮位可能就係睇佢哋跳舞。但對於我哋嚟講，當晚高潮位當然係一對新鮮滾熱辣嘅新人比人叫上台啦，wakakaka

原來弟婦喺 book 位時註明佢哋係 wedding couple，諗住睇下有咩 jetso，因為好似聽聞過會有嘢送。點知餐廳方面突然叫咗佢哋上台 kiss kiss, hug hug + 祝酒。本來佢哋千萬個唔願意上台，不過我覺得入鄉隨俗，而且係一個好難忘嘅回憶，要上台跳舞就話就 say no 啫，做呢 d sweet sweet 動作無難度嘅。全個過程我老公都影低晒！

最後餐廳都送咗個 wedding cake 比佢哋 sweet 返下

到咗 show 嘅尾聲，有演員同大家合照。我見到有人比 tips 佢，我哋就無啦。不過我哋都唔執輸影返張留念先。

呢餐 BBQ 食得太飽，所以我哋幾個又去多次酒店附近個 K Mart 入手信。右邊嗰支 Adidas 香體露好平 (歐陽生用架)，喺香港賣 HK$128，喺關島買只係 HK$3X。

我仲買咗個磁石，因為我有一個習慣，每去一個地方旅行，我都會買返個當地有紀念性嘅磁石，貼喺屋企個雪櫃度，每次望見都會覺得好開心。唔知我幾時先可以貼滿整個雪櫃呢？

暈 ed @ 12W

2013 年 3 月 9 日 (星期六)

連埋之前嗰日去咗做 oscar test，我順便拎埋今日星期六呢半日假，下午約咗去做 facial。其實全日都冇事冇幹，唔知做乜喺我做完 facial 搭輕鐵返屋企時竟然喺輕鐵入面暈低咗。大家唔好擔心，等我講講事發經過~~~（有 d 長篇）

其實當日我有食早餐午餐，亦夠訓（就算唔夠訓，做 facial 時都訓咗好耐啦）。
我離開後就去咗輕鐵站等車返屋企。當時 4 點幾，有陽光但唔算猛烈。個月台雖然有蓋，但係偏偏因為角度問題，個蓋係擋唔到太陽，我等車等咗 5 mins 左右，就應該曬咗 3 mins 到啦。

上到車，其實覺得好攰（我解釋唔到點解覺得攰，照道理啱啱先喺 facial 床落地，唔會攰得去邊，但總之當時就係覺得攰），但係車箱坐滿晒人，仲有少量人要企，我又未見肚，好人好姐唔會有人讓位係咪先？咁算啦，我都係幾個站啫，企埋一邊篤電話囉。點知篤咗 5 mins 左右就嚟料啦。

首先眼前嘅景物開始變得白濛濛，然後右上角開始有雪花，我自然反應就合埋眼，天真地以為比對眼抖一抖再開眼應該冇問題，同時間我都將部電話放返入手袋。點知就喺我合埋眼，原來我就暈低咗。<-- 呢層我自己都唔知，只係突然有個女人拍我隻手同我講：「小姐，你暈低咗喎，你有冇事？你嚟坐低先啦！」我先慢慢企返起身。。。其實有人拍醒我嗰刻，我仲喺度諗：我訓緊覺，做咩叫醒我喎（勁白痴）。坐低咗，我先發覺全個車箱嘅人都望住我，架輕鐵就停咗喺個站唔郁，輕鐵司機都過埋嚟（因為有人按咗緊急制）。司機問我有冇食早餐，我答有。問我其實仲有幾耐落車..... 其實我只係差兩個站。問我洗唔洗 call 白車，其實嗰刻我知自己完全清醒，所以我拒絕咗。之後佢再問我有冇長期病患，我答冇，不過我話我有咗 3 個月 BB。佢竟然話既然我有 BB，我又暈過，堅持想我去醫院。咁我心諗去照一照都好嘅，就答應咗。人生第一次享受白車服務就係今日啦。哈哈哈~~~

司機見我醒咗，我 feel 到佢去嗰兩個站好似開得特別慢，真係多謝佢咁照顧我。佢同我講已經幫我叫咗白車喺洪水橋個站等我。

輕鐵到咗洪水橋站，其實我自己都落到車，個司機又跑出嚟照顧我，叫我搵個位坐低等一等，有另一個職員搭緊後面班輕鐵嚟，佢要繼續開工。唔洗 2 mins 個職員到咗，問我咗少少資料做埋登記，我已經聽到白車嘅 be bu 聲。我望一望，嘩！出動到擔架床？我立即企起身，同個職員講，其實我行得喎，唔洗訓床咁大陣仗，不過輕鐵職員都叫我唔好亂郁。救護員嚟到我仍然話唔洗訓床，所以我就由佢哋陪同行咗上白車。

上到白車又量血壓，探熱，仲夾手指，問完一大輪嘢。期閒我通知咗媽咪同埋老公，不過我話應該冇問題，touchwood 我有咩事先趕嚟醫院啦。搞咗好耐好耐，架白車先駛去屯門醫院。估唔到尋日嚟咗一次做 oscar，今日又要返嚟睇急症。

去到急症，個救護員幫我搵咗個位安排我坐低，自動波幫我做晒所有登記嘅手續。然後佢拎個籌比我，我一睇，竟然係一級緊急！有 BB 果然係大晒！

好快，真係好快就叫我個名，又去量血壓 + 探熱。之後再去「初檢站」見一個醫生，佢問我點解暈，問一大堆問題，我講咗佢知我有 3 個月 BB，佢聽到後即刻叫醫院嬸嬸推張輪椅嚟，我心諗唔洗咁誇呀？不過是但啦！醫生解釋一陣會同我照 BB 睇下佢有冇事，會做埋心電圖，驗血糖。個嬸嬸先推我去做心電圖，咁大個女都係第一次。原來做心電圖好快架咋，有 4 個扣扣住我兩隻手腕腳腕，再有 d 類似吸盤嘅東東吸住我個心附近，唔洗一分鐘電腦就出到報告，快靚正又唔痛！

下一步見另一個醫生，又問一大堆嘢，同我做咗好多腦部嘅 test，叫我掂下佢隻手指同埋自己個鼻，左右手來回做 5 下，又幫我 check 眼睇下睇嘢有冇影。之後終於到我最期待嘅環節 ----- 照超聲波睇 BB。可惜我訓上張床後係睇唔到個 mon，只得個醫身睇。其實我都對 BB 有信心，因為暈完之後我都冇見紅見啡，佢應該無事。醫生望住個 mon 同我講，BB 喺度彈下彈下，不過個心跳比嘢遮住咗。我當時喺度諗，咁即係點呢？識郁係咪代表 OK？可能呢個始終唔係婦產科醫生，佢對住部超聲波機好明顯有 d 不知所措。佢好想放大個 BB 睇清楚個心跳，不過不斷 click 錯掣。。。好在，佢最後都搵到 BB 心跳，仲轉埋個 mon 過嚟比我睇。

照完超聲波再等篤手指驗血糖，原來篤手指都幾痛。。。

篤完手指再等見多次醫生，醫生話無論心電圖，血糖，血壓，體溫，超聲波所有嘢都正常。今次暈係解釋唔到，只係話可能我唔夠休息，同埋暈都係孕婦常見。

就係咁體驗咗一次急症室半日遊。可能我始終有個小生命喺身體入面，拎住個一級緊急籌，做晒以上所有嘢都唔洗一個鐘，比埋錢就走得。就係呢個時候老公趕到入嚟屯門醫院接我走，夜晚再返媽咪度食返餐有營養嘅晚飯。

雖然今次唔係 d 咩大吉利是，不過我都唔想再有下一次。媽咪仲嚇我暈開就暈。咪呀，千祈唔好呀。不過其實我自己都驚，即刻將部 iphone set 咗唔洗用 password 就開到，都係以防萬一啫。

屯門醫院 Oscar Test @ 11W6D

2013 年 3 月 8 日 (星期五)

距離上一次見到小 B 只係兩星期左右，今日去做 oscar 又有得見啦，所以我話特別鐘意呢個 3 月。

醫院比個期係當日 1:30，時間唔湯唔水，被迫要請全日假。

我哋 1:25 先去到（鑊鑊都係啱啱好），到咗登記窗口，D 姑娘話搭正 1:30 先辦公，叫我企喺隔離等等。我本能反應就去搵位坐，但歐陽生唔知點解好醒咁識得排隊，不過突然間有兩位媽媽聽到姑娘咁講就衝出嚟一齊排，因為咁拎咗個 3 號籌。

拎完籌等嗌名，先係磅重，個磅話我 50.X kg (我極度懷疑個磅唔啱囉，我冇咁輕 XD，而且我冇嘔，又行得食得訓得，唔會冇啦啦瘦咗）

磅完重就等，等等等，等埋其他人磅完重一齊入一間房睇陳年 DVD，認識咩叫「唐氏綜合症」。DVD 入面嘅演員 D 裝扮、髮型仲係吹到騎樓咁高，副眼鏡係超級大框 + 大鏡片，個旁白又唔好聽，絕對係催眠之最！

睇完套陳年 DVD 後，就填回條同意做呢個測試。出返去大堂，又等嗌名。好在之前歐陽生幫我拎咗個 3 號籌，唔洗等太耐就叫我。入到去間大房（劏開好多張細床），有位姑娘幫我照超聲波，個 mon 就有一部正常 LCD 電視咁大。（之前有朋友話係 42" mon，等我仲期待咗好耐）

吱好啫喱（係暖架）就開始照，先睇睇 BB size 合唔合格度頸皮。估唔到冇見 BB 兩星期，佢已經由 3.75 cm 長大到 5.X cm 啦（BB 必須有 4.5 cm 大先可以度到頸皮）。BB 本身都唔係好合作，我見姑娘用個探頭碌咗好耐都唔係好啱姿勢。換咗好幾個角度，又係咁用個探頭篤我個肚，BB 先轉一轉身。不過期間佢都好活躍，又啜手指，又揮手，睇到我同歐陽生好興奮。

碌咗一陣，我見個姑娘都開始嘆氣，我以為我要出去散下步等 BB 轉個姿勢再度過。姑娘都忍唔住問我：媽媽你急唔急小便？但係嗰刻我真係唔急，所以我答佢唔急。點知問完呢個問題，姑娘就即刻照到啦。之後就只係講咗句：「幾好吖，正常」我再追問：「咁即係度到幾厚呀？」佢先肯講 1.7mm，我之前做咗功課，只要低過 3mm 其實都算正常。照完之後去抽血就走得，如果兩星期內收唔到電話就代表驗血報告 pass。So far 我今日差兩日就剛剛夠兩星期，我當自己 pass 咗架啦。因為醫院都話其實驗血報告好快出，如果真係有問題，2-3 日內都一定會通知媽媽。我都過咗咁耐，應該都過關啦。

其實今次想搏大霧睇下姑娘肯唔肯照仔定女，因為 d 懷孕書話 BB 嘅性器官其實宜家發育緊，可惜睇嗰套陳年 DVD 時已講明唔會幫大家睇性別。咁算啦，留返下次再去私家覆診時慢慢照。還掂我都未咁快開始買 BB 用品，早知定遲知都冇所謂。

再做產檢 @ 10W3D

2013 年 1 月 26 日 (星期二)

今日又去咗私家醫生覆診啦。

其實本來冇睇得咁密嘅，個 booking 原本係下星期四 (7/3)，但因為咁啱屯門醫院排咗個 oscar 期比我係下星期五 (8/3)，為免連續兩日都要請假唔知點同公司講，咁不如將私家個期提早，況且我都想早 d 見下小 B。

約咗高醫生 5:30，歐陽生再一次話陪我去，結果都係遲大到，得我一個見醫生，見完我仲等返佢轉頭。。。

今次等咗半個鐘左右就見得醫生，入到去都係輕輕交代下我嘅近況，有冇不適等等，傾唔夠幾句就訓上床照超聲波，始終點講都冇用，都係睇下小 B 嘅近況最實際嘛。。。

今日唔覺唔覺已經 10W3D 啦，估唔到冇見佢 3 個星期，又大隻咗，仲成型啦。

之前一 pat 嘢咁，完全靠估，宜家我比張相媽咪睇，佢都一眼就睇到邊忽打邊忽啦。

照超聲波時，我作為媽媽嘅真係眼都唔眨咁望實個 mon，然後就等醫生呢一句：「哦，幾好吖。」即刻鬆咗口氣。開始明白咩叫「養兒一百歲，長憂九十九」。

剛剛 bingo 時，又怕佢唔知係咪空心胎。
照到有心跳時，又怕佢唔知喺裡面住成點，驚呢樣驚嗰樣，就連打個乞痴都怕震親佢。
每一次去做檢查時，總係擔心佢會唔會已經停止生長？會唔會無聲無色咁冇咗心跳？
照 oscar，又怕自己係 high risk。
照結構，又怕醫生話我知有問題。
到第時 feel 到胎動，又擔心會唔會胎動次數唔夠？

一個細胞嘅分裂，慢慢成為一個有心跳有內臟，有手有腳有思想嘅人仔，過程真係十萬個複雜，萬一有一個程序錯咗就 byebye，所以話唔擔心就假，而且原來小產機會率係 25%。。。都係一個幾大嘅數字（雖然我哋乜都做唔到）。

照超聲波期間，我再問埋醫生 BB 宜家嘅 size，因為我最怕就係佢唔足 size。醫生一陣可以幫我計返，再送多我一句：「BB 都好好喎，有心跳，胎水都好夠。」真係成個人都安樂晒。

講返 size，其實自從上次 7W5D 照過心跳後，數日子我今日覆診應該係 10W3D，估唔到小 B 嘅成長速度都好合作，超聲波量度出嚟嘅 size exactly 係 10W3D，正！

其實一路都好感激我係冇不良反應嘅一群媽媽，行得走得、食得訓得。
行到今時今日呢一步暫時都算順利，我知道所有嘢真係得來不易亦唔係必然，要繼續加油！

今次醫生開埋孕婦維他命比我，
點解 d 藥丸要一次比一次大粒，仲要越嚟越厚？
其實我嘅弱項係吞藥丸，今次真係大考驗！

(左至右)：
葉酸（最細粒，就快可以唔洗食啦！=P）
鈣片（size 仲頂得住，整個孕期都要食）
孕婦維他命（實在唔可以一次過吞，一定要搣開一半，又係整個孕期都要食）

我成日都覺得我似係一個長期病患者多過似一個孕婦囉 ~~~

******************************************************************************
特別喜歡呢個 3 月，因為咁啱得咁橋要陸續見醫生，覆診嘅期排到兩個星期照一次，可以好安定咁 mon 實小 B 嘅發育。

10W3D - 私家覆診（今次）
11W6D - 屯門醫院照 oscar
13W4D - 健康院產前檢查
15W+ - 私家覆診

我唔貪心，唔奢求每次都要照超聲波見到小 B，但如果有得聽下心跳，有位專業醫護人員同我講聲：「BB 幾好吖，有心跳，一切正常」，呢樣就係做媽媽最想聽到嘅說話，咁我就心足架啦。