弊啦弊啦，左右兩隻腳都傷咗，好在下星期連續兩堂嘅跳舞堂都因老師出埠而取消，我總算叫做有 D 時間比雙腳休息休息。
右腳膝蓋一直都係舊患，應該係因為自己大腿肌肉唔夠 strong，變咗所有力量由膝蓋承受，久而久之就痛起上嚟。之前直情係唔可以踎低，連平時著鞋都有難度。好在嗰陣睇咗醫生，醫生好漫不經意咁話我只係血液循環唔好，得閒就自己按摩下。數數手指，原來差不多傷咗一年，不過.... 明顯睇住自己恢復緊，茅事茅事。
左腳....... 係新傷。再傷落去歐陽生一定唔比我再跳舞 >.<
話說左腳大腿近膝蓋位置由星期日開始微痛，我都不以為意，以為又係好似右腳咁只係血液唔循環，又或者以為自己只係太攰（因為當日做咗好多家務呀）。星期二跳完第一堂舞，整堂都冇乜唔妥，但跳完後肌肉的確比平時實。返到屋企沖涼時搽梘，一捽...... 咦？微微腫起咗？乜事？嗰陣我都仲係冇理佢，沖完涼就去訓，以為第二朝早起身後會冇事。
第二日起身再摸一摸患處，OH MY GOD! 腫得比尋日更嚴重，我就知道自己拉傷咗肌肉了。幸好冇影響到平時走路，諗住上埋今晚嗰堂先算。
返到公司，上網查下肌肉拉傷要點處理。原來屬於小事，只係凍敷 + 搽藥膏就 OK，但係要起碼比肌肉休息一星期。<--- 呢點我就不能退讓，星期五仲有一堂呀！雖然我唔係唔要命都走去跳舞嘅人，但係我評估過自己嘅能力，我仲行得走得跳得，只係唔踎得，跳舞冇問題。
夜晚上堂時做 d warm up 動作其實都要就住就住（有壓腿嘛，點壓啫，我都屈唔埋隻腳....），但係舞步就唔洗就住，可以同平時一樣表現理想。冇人察覺我出現問題，最尾仲比老師 select 咗我一齊跳添 ~
落堂後，唔洗問，腫痛情況當然比之前兩日更嚴重啦，仲微熱添。所以立即問咗老師意見，同我上網搵嘅資料一樣，都係凍敷 + 搽藥膏。
返到屋企渣渣臨敷冰先，好在 N 年前買雪糕月餅附送嗰舊冰塊我仲留住，細細舊 size 啱啱好，今次佢大派用場啦！
敷完後立即紅晒，嗰一刻真係嚇親，不過歐陽生解釋可能因為凍得滯，咁先紅咗啫。
下一步就係搽藥膏。放學時喺尖沙咀求其一間藥房買藥膏，staff 真係識做，一介紹就咁貴。HK$120 真係肉都痛埋，不過我冇得揀，而且預咗尖沙咀 d 藥房專做遊客生意，只不過我冇諗過要 over HK$100 啫~~~
staff 仲話如果 50g 唔夠，可以買支再大 d..... 啋啋啋，我唔想自己成日傷，50g 好啦，況且大 size 容乜易你定價 HK$500 架？
其實發覺腫脹後，一直都只係用手去摸，冇認真觀察佢腫成點，原來都。。。不容忽視架喎
經過兩晚凍敷 + 搽藥膏後，今日 (星期五)，情況明顯己經有好轉架啦，依然係踎唔到跪唔到屈唔到，但係起碼我嘗試去做時已經冇咁痛。
傷患未愈，但今晚仍然去上一堂。可以跳嘅時間越嚟越少了，我會把握每一次上堂嘅時間，除非我真係行唔郁（touchwood）。
趁住下星期只需要上一堂........
目標：下星期五前要好返 8 成！
