大姑奶駕到

我將會榮升做「大姑奶」啦！

我家細佬將會同佢女朋友於12.12.12 喺關島註冊，明年 3.29 再喺香港補擺囍酒，而我就會升呢做大姑奶啦！

有好多親朋戚友都話我哋兩姊弟夠長情，細佬同佢女朋友喺中二開始拍拖，直至今年已經差不多拍拖 10 年。而我與歐陽生亦拍咗 9 年就拉埋天窗。咦..... 又係喎，真係唔係玩玩吓。

適逄佢哋註冊日期係 12.12.12，同我嘅結婚週年紀念日只差兩個星期左右，如果冇其他地方 plan 好，關島將會成為我同歐陽生結婚三週年嘅旅行地方，今次終於可以衝出亞洲啦，但係....... 陽光與海灘 again~~~~~ 雖然我哋都鐘意，不過連續 3 年都係呢類型旅行，真係有 d 想停一停。所以其實我同歐陽生最想都係去多次日本，無論大阪又好，沖繩又好，甚至乎 encore 北海道都好，日本真係一個好值得去完再去嘅地方，可惜點都有 d 擔心幅射問題，唔通真係要從此同日本隔絕？？？最近逛書局時，有意無意都去睇睇 d 旅遊書，睇下有冇咩地方想去，不過視線仍然停留喺 "日本"。呀~~~~~~ 日本呀日本，我真係好想再嚟探你，我想去大阪睇櫻花／紅葉！

唉，呢 d 嘢都係遲 d 再諗。細佬註冊，做家姐嘅當然支持到底，到時我哋一家會飛過去觀禮，再喺嗰邊 join d tours 呀，stay 幾日呀，最好有得潛水，又係歐陽生最愛。

佢哋會喺呢度註冊...

St. Probus Holy Chapel @ Guam

上網話關島嘅 UV 指數爆晒燈，係香港嘅 500 倍，就算搽 100 度以上嘅防晒都未必遮擋得到。Oh My God！又一次變碳燒咁返香港!!!

題外話：細佬香港擺酒嗰餐，我幫忙婚宴統籌一職幫佢哋做格價專員。由擺酒日期，過大禮日期，甚至租衫，化妝等等都一齊去傾。其實之前我搞自己嘅婚禮時，緣美傳說已經有人搵過我，叫我 part time 咁幫佢哋做 wedding planner，因為佢話覺得我好細心，識講嘢..... 但後來我都推咗，始終我係一個唔鐘意太 social 嘅人。不過搞埋細佬個 wedding 後，第時想轉行真係可以諗諗 wedding planner 呢行，哈哈。

♥♥ 結婚兩週年布吉之旅 ♥♥ - Relax at Patong @ Day 5

2011 年 11 月 30 日 (星期三)

話咁快就去到個 trip 嘅最後一日，由於坐 18:25 機，所以都冇特別安排任何節目，純粹 hea + shopping，而且呢個一向都係我哋兩個嘅習慣。

今早可以訓到自然醒，起身梳洗後就執行李。呢一張相係 Day 3 出島時 d 工作人員幫我哋影嘅相，目的當然係賣返比遊客賺下外快啦。我記得當日同團冇人買，我見個工作人員一副失落嘅面孔，再望望自己張相，都唔算太差啫，個相框又幾精美... 況且今趟都冇買過嘢比自己，於是就決定幫佢買，盛惠 100B。其實都貴架，不過出得嚟玩就唔好成日左計右計，呢幅相就成為整個 trip 我同歐陽生送比自己唯一一份手信。

手信 show off 時間..... 其實今次買嘅嘢真係唔多，大部份以食為主。好多時都係因為見香港冇先買，而且都係例牌比家人及同事。



去食埋 last day 早餐就 check out 酒店，順便寄存埋 d 行李放心出去大吃大喝。之前 4 日朝朝都趕頭趕命等人 pick up 去玩，都未正式欣賞下個 lobby，其實都唔差嘅。

Lobby 養咗 d 錦鯉，一向好鐘意玩魚嘅歐陽生又喺度玩魚.... 成個金魚佬 -_-"

留咗倩影後，我哋兩個又慢慢行去 Patong Beach 食 Briley 雞飯。其實 Day 1 已經想食，不過因為我哋太遲先搵到間舖，佢哋收爐大吉 lu，所以就安排今日去補食。沿途嘅風景真係好靚好靚，以下呢兩張相我都冇任何加工，真係完完全全嘅「水清沙幼」。去旅行有時都太走馬看花，原來酒店附近個景係咁靚，我竟然 last day 先發現。

沿途再次見到呢隻「海嘯狗」，其實 Day 1 已經同佢影咗一次相，但係嗰陣係夜晚，所以宜家再影多一次。



由於 Day 1 已經探過路，所以今次好快就搵到 Briley 雞飯嘅所在。

呢度賣嘅，除咗雞飯，都係雞飯..... 我哋一人嗌咗一份。膽粗粗問佢有冇 lemongrass tea，點知都係冇，結果又係飲可樂。

其實我一早就知道碟雞飯份量咁少，一定唔夠我 honey 醫肚，所以食完後我就建議去對面街嘅串燒檔買返兩串燒雞翼。如果我冇搵錯的話，呢檔串燒檔喺網上都有好多人激讚架。



得嗰兩串串燒，醫肚作用當然不大啦。當時太陽伯伯好兇猛，所以我哋又行咗去 Jungceylon 商場嘆下冷氣，順道 encore 多次 Swenden's 雪糕。



好可惜，本身想食 9 球火鍋，不過店員話冇得賣，唔知係太早定係其他原因，結果我又係食返嗰個邪惡朱古力新地。冇得食，唯有影返張相補數 =P



食咗幾樣嘢，我估 honey 都應該飽啦啩。於是乎又走圍行，打算再買多少少手信。不過時間不太充裕，只可以留喺 Jungceylon 衝刺。買手信之前我哋去咗影相，呢個麥當勞叔叔成為布吉必影景點之一，我哋都影返張相先.... 初初都好正經咁影....

但後來開始傻咗啦...... 不過宜家睇返仍然覺得好好笑



笑完後，就落咗去 Jungceylon 商場地庫 shopping。講真，冇乜太多嘢行，都係主攻食品多。仲有呢一堆佢識我，我唔識佢嘅「異形」，我真係懷疑有冇人會買佢哋返屋企？

行到咁上下，係時候返酒店攞返 d 行李，會合 pick up service 去機場。

終於要走啦，都冇同酒店大堂影過一張相，快快影返張先。

到機場辦妥 check in 手續



布吉機場真係唔算大，一眼望晒！

 

咦，雙眼一閃......... 有 Donut 喎....... 我真係無時無刻都可以食嘢..... 歐陽生都非常清楚我嘅辟好，好嘢..... tea time!!!

夠鐘上機啦，今次都係坐機翼附近

 

飛機起飛時撞啱係日落時間，好靚呀...... 急不及待影返幅靚相先，byebye Phuket

 

至於飛機餐，回程比去程好食，或者係 d 餸啱我口味 d 啦。仲奉送一個可以用嚟殺人嘅芒果味雪糕，雪到好硬好硬，真係可以扔死人！