唔覺唔覺個 blog 比我荒廢咗成個月有多，其實我有好多嘢想講，好多嘢想寫，不過成個 4 月成為咗我嘅地獄月，所以先咁耐冇 update！復活節長假期後，我每日放工時間都係夜晚 10 點之後，試過有一日返到屋企連望都冇望老公兩眼就走咗去沖涼訓覺。不過地獄生活已成過去啦，下一個 peak 應該係 9 月.... >.<
2009 年 11 月 21 日（星期六）
成為咗歐陽師奶後，本來想留喺緣美傳說食少少嘢，最少都飲杯嘢潤潤喉先走。但係時間真係唔容許，都係怪自己之前計錯時間 + 塞車，唯有摩打腳咁走去 Heritage 1881 影外影。
仲記得架花車停咗喺 1881 Tiffany 門口，主攝影師 Hero 快快手同我影咗 2 張，已經有一個 security 走埋嚟話唔准喺人哋 d 舖頭前面影相，因為嗰度屬於 Tiffany... 我當時以為真係開始唔比人影相（因為之前都聽講過），但係 Hero 非常之架輕就熟咁叫我哋行前兩步，踩過咗個坑渠蓋後，嗰度開始就屬於公眾地方，可以任影咯，食蕉都冇我哋符！Hero 好嘢！
當日喺 1881 入面有超超超多人影相，齋計結婚相都已經有超過 5 對，加上家庭相，畢業相等等，幾乎人人都係入嚟影相～！
我相信 Hero 影 1881 都影到熟晒，當日我根本冇多餘時間欣賞 1881 係咩樣，已經比 Hero 當公仔咁舞... 舞咗好耐... 第一個景點影完，即撇，再去第二個景點，影完，再撇... 如是者... 佢好似熟晒邊度影先會靚～
↓ 呢 d 咁嘅 pose 當然係老公出聲話要影架啦！嗰一嘢我 feel 到 Hero 都唔係好想理佢，因為 Hero 真係幫我睇實緊 d 時間，不過老公好似玩條絲帶玩得好開心，Hero 都要應酬下佢，我係超無奈...
↓ 老實講，Hero 諗出嚟嗰 d pose... 有 d 我真係唔係好鐘意，不過我覺得還掂未試過影，就即管試下，結婚當日都唔再試就冇機會再影，點知... 效果都係麻麻地～
不過... 凡事總有例外... 呢兩張我同老公係抄抄抄抄抄鐘意！感謝 Hero！（註：其實已經離開咗 1881，沿路行緊去天星碼頭搭船過海啦）
我鐘意呢四格，夠自然！
↓ 唔明？我都唔明點解明明係綠燈，都係無人過馬路？
去到碼頭，其實都牽起咗一陣哄動... 可能無乜新人會著住成套武裝喺碼頭出現... 仲要唔係純料取景咁簡單，係堅搭船喎...
好記得上到船艙，Hero 就帶領我哋去船頭。本來後面好多人都想坐船頭，但係見到有人影相，結果讓晒成個船頭嘅一邊比我哋，影響到大家真係唔好意思！
↓ 我用咗呢張相做 Banner 相，就知我有幾愛呢張相...
影完呢 d pose，Hero 叫我哋可以坐低抖下，咁我同老公咪喪傾計囉，原來佢又偷偷地影我哋，仲影到 d 失晒儀態嘅相... @.@
↑、↓ 有 d 知佢堅影，有 d 佢真係偷影...
隻船埋岸啦，要落船會合花車去酒樓，再喺船上面影多少少
↓ 好明顯呢 d 又係老公嘅主意...
上岸啦... 好似我咁... 上岸嫁人啦... bye bye～
上到岸，原來架花車停咗喺第二邊，我哋幾個又爭取時間影到夠...
再次感謝 Hero，感謝當日天朗氣清！各 1121 戰友，有冇發覺當日個天係咁靚？
影影下... 見到花車嚟啦～
全日都冇乜機會同花車影相，所以 Hero 幫我爭取每一分一秒，再影影影，影爆佢！
我鐘意呢張... 好自然～
↓ 姣婆等緊人錫...
↓ 錫到啦... 滿足未？
外影篇已經完滿結束，下篇開始報告酒樓盛況！
