大眾踩單車郊野上~~

上個星期六, 我同咗B仔入沙田大圍踩單車! 因為佢由10月起逄星期日都冇得放假陪我lu, 咁我梗係拉佢去同我玩啦! 不過唔知係咪人老啦, 踩單車都好似冇以前踩得咁快, 又快咗覺得累! 不過我唔會覺得辛苦, 因為自己本身都幾鐘意踩單車...唔知係咪因為架單車個seat位唔係咁好, 踩完之後我哋兩個都覺得個pat pat好痛呀!!!  我哋由3:00左右踩到6:30, 就已經來回咗大圍同埋大埔, 自己都覺得幾犀利, 因為時間上竟然快過以前...

踩完單車之後, 我哋兩個就約咗auntie uncle & 阿豪一齊去咗一間酒樓打邊爐!!! 嘩, 星期六晚去食, 只係HK$58一個人, 任食任飲, d汽水竟然係樽裝嗰隻任飲, 嘢食又任叫, 最緊要係d丸類, 竟然全部都係人手打出嚟, 真係好平好抵。不過佢收咗我哋HK$90醬料錢, 除返我哋5個人, 其實都OK, 計埋加一, 每個人都唔洗HK$100, 真係幾正...

食完飯之後又同咗阿豪一齊落樓下打桌球, 我第一次真真正正埋枱打, 不過成績都算係咁啦, 起碼唔會零蛋兼倒扣分數。我諗今次都算學成啩, 竟然打上癮, 好想有機會再打過~~~

星期日, 我通常都會冇乜節目, 因為夜晚留喺屋企睇「美女廚房」啦! 就係因為呢套嘢, 我已經好多個星期日冇出街...可能因為之前嗰日踩單車太刺激, 一訓醒都已經12點咁滯, 之後就落街食嘢, 買餸煲湯...嘻, 十足一個家庭主婦...我煲咗B仔最鐘意嘅「霸王花XXXX湯」, 哈哈, 佢飲得好滋味......, 有陣時, 為自己鐘意嘅人做咗小女人, 其實都幾開心嘅

人...總會成長到另一階段

hehe, 今日其實要返工架, 不過我好早就走咗, 返咗屋企啦! 因為我覺得個肚勁痛, 又見手頭上無乜嘢做, 咪早退囉! 其實臨走時喺公司已經食咗一粒散利痛, 好咗好多, 不過既然有藉口可以早退, 咁梗係走啦, 係咪先! 哈哈!! 不過返到屋企之後我都冇休息, 只係睇吓電視, 睇吓雜誌, 咁就過咗幾個鐘囉! 唔緊要啦, 雖然好似浪費咗d時間, 不過有時當relax吓都唔錯呀!

返到屋企之後我比一種聲吸引住, 就係樓下間中學啦啦隊綵排嘅叫喊聲呀, 我即刻望落街.... 佢哋都幾整齊, 一齊嗌口號, 一齊做動作, 唔錯呀! 令我諗起我讀中學嗰時做啦啦隊, 又係咁樣架, 傻吓傻吓囉! 人哋叫我做動作, 咪做囉.....叫我大聲叫口號, 咪叫囉, 哈哈! 起初其實都唔係咁鐘意做啦啦隊, 因為嗰陣時聽d師姐講話做啦啦隊成員好悶, 冇乜嘢玩....不過嗰陣時我哋係強迫性要做架, 但係做落之後又覺得幾好玩...一班人一齊打氣, 又為自己個社嘅運動員吶喊, 個感覺幾warm架....過咗一年之後下年仲想做添! 不過因為我係Red Cross Member, 之後年年都要站岡, 所以冇得做囉! 哈, 嗰陣時呀, 都不知幾個人想入嚟Red Cross室裡面呀! 因為個Red Cross室係成個運動場上唯一一個地方有冷氣....haha, 所以d人咪羡慕我有得長期喺Red Cross室囉...有d仲搞笑, 扮整傷入嚟摶涼冷氣....不過............呢d日子冇lu, 人, 終會成長去另一個階段嘅~ 我今日都咁諗~~去到另一個階段, 又會有另一番體會, 到時又會懷念返以家嘅日子啫! 

解脫與珍惜

終於忙完啦, 之前簡直忙到死死吓! 又要出Interim Report, 開咗幾晚OT, 最後得到嘅係好多粒暗瘡而唔係OT Pay, 真係慘, 要做返多d mask先得~~

今日返半日, 下午約咗男朋友一齊去旺角學整New York Cheese Cake! 原本只係我一個人話想學啫, 後來佢話佢又去學, 我到有d surprise.......原來佢只係驚我一個人會悶, 所以就嚟陪我上堂, 所以我成日都話呢個男人幾好, 佢真係幾錫我!! 唔知整完個Cheese cake之後, 見唔見得人呢?

早兩日上網search嘢, 無意中比我發現咗一個日記網站, 裡面有一個故事, 其實應該聽過好多次架啦, 不過真係覺得幾正, 所以post多一次。

一天晚上，兩個決定分手的戀人，正在談判中。 
女孩雙眼紅腫冷眼看了一看男的，便把剛才寫好的清單遞了給他：
檯燈 ----- 我買的。
書架 ----- 我買的。
相框 ----- 我買的。
時鐘 ----- 我買的。
椅子 ----- 我買的。
以上物品我將搬走。

男孩看了一眼，從桌上拿起一根筆，伏在桌前掁筆疾書，也給她一張紙： 
棉被 ----- 免費。
衣櫃 ----- 免費。
熱水瓶 ----- 免費。
電話 ----- 免費。
兩百封信 ----- 免費。
無數次的接送 ----- 免費。
陪著妳、照顧妳、等妳 ----- 免費。
妳愛逛街，我帶箸妳到處跑 ----- 免費。
以上全部免費贈送，歡迎搬走。
所有的衣服，花朵 ----- 免費。
還有為妳焦慮，為妳歡喜，這些都是免費的。
以上全部都加起來，對妳的真愛仍是免費的。

女孩看後，剛收藏好的淚水又逐漸解放出來；她垂下頭，吸一吸鼻子，再抬起頭還是冷冷地看著男孩說：以上所有東西我全都搬走，還有你 ----- 我撰的，也要搬走！！
男孩二話不說便撲向女孩的懷抱裡，在她耳邊悄聲地說：把我搬走吧！！讓我一世依賴著妳！！

新Blog出現啦!!! 我愛郭富城Aaron Kwok

Hello, 大家好! 個Blog好辛苦咁整好咗啦! 最麻煩係upload d 相囉, 唔知點解整極都整唔到, 搞咗我好耐...

當你哋入到嚟，一睇就知我係Aaron's fan啦，我由小學三四年級開始就鐘意佢，大大話話都有14-5年啦！唔知點解呢，覺得呢個世界上竟然有一個咁嘅美男子，真係好正~所以我仲入咗佢嘅歌迷會添! 希望將來有多d機會見到Aaron啦!

係喎, 首先介紹一下自己先啦! (咩名唔洗講啦啩) 我喺灣仔做嘢, 唔........做文職囉, 其實個職位係叫做「公司秘書」, 但係千其唔好誤會, 公司秘書係絕對唔同私人秘書!!! 私人秘書係指幫某一個老闆, 得閒幫老闆make appointment, 沖吓咖啡, 坐吓大脾 (heeee, 純粹開玩笑), 但係公司秘書係做d比較專業d嘅嘢, 處理親嘅文件通常都係法律文件! 係高級d架, 喺某d大公司, 公司秘書仲會有助手添~而且要立志做一個公司秘書, 係需要考牌架, 即等於考個會計師牌咁, 所以話公司秘書同私人秘書係無得比較! 而且做開私人秘書係唔可以做公司秘書, 但係調返轉, 做可公司秘書, 就可以做私人秘書啦, 因為私人嗰種本身無乜特別要求....

工作就講完啦, 講吓家庭啦! 我本身住喺天水圍, 家庭成員有父母同埋一個細佬! 但係有時我會喺元朗洪水橋嗰邊過夜, 因為我同男朋友喺嗰區買咗間屋呀, 所以放假時我都會過吓去訓!

講起放假, 真係興奮呀, 因為我申請咗星期三放假啦, 實在太好啦, 因為有差唔多四個月(由6月開始)都冇放過假(當然唔計星期日啦), 所以期待嗰日來臨呀...........