婚前檢查 + 預防子宮頸癌針

2009 年 3 月 15 日（星期日）

好開心呀，今次婚紗展之行我搞掂咗好多樣嘢！終於可以歎吓，唔洗日日返工都上網做資料搜集啦！

婚前檢查

之前一直猶疑究竟做唔做婚前檢查好，雖然有計劃婚後兩年先生 BB，不過為咗「安心」兩字起見，都係 book 埋唔好煩，萬一婚後突然想早 d 生，都唔洗倒瀉籮蟹咁款吖！所以喺入 expo 前已經做咗一輪功課，決定 join 呢間 --- 毅力醫護健康集團。比咗 $1,280 join 咗個詳細檢查 package，乜都驗一餐，話晒今次都係我同男朋友人生第一次做 checking 嘛（係，我知我哋係唔應該呢個年紀先去做檢查，我知衰架啦）。

睇唔清楚以上張單張的話，可以 refer 去呢度：

http://www.kinetics.hk/download/pre-marital%20plan.pdf

呢間毅力醫護都唔惹少，我見好多對 couples 都 join 咗佢哋！喺我排隊等抽獎（匯豐銀行）時，都見到好多人手持呢張單，今次佢都應該接咗好多生意啦！

********************************************************************

預防子宮頸癌針

呢個真係意外收穫，因為我從來冇諗過會 join！記得之前呢隻預防針一推出，講明話 9-25 歲，從來無性行為嘅女性先啱打，我嗰陣啱啱 26 歲，以為自己唔適合打，所以一直都冇理會。原來已經出咗第二代疫苗，宜家仲受埋年紀大 dd 嘅女性玩，護士話 55 歲以下都打得喎。

之前我都質疑究竟係咪真係可以有效預防子宮頸癌呢？護士話如果 25 歲以下，又從未有性行為的話，可以 100% 預防。如果唔符合呢個條件，就可以吸收到支針嘅 80% 抗體，加埋每年嘅婦科檢查（14%）= 94% 預防喎～ 而且衛生署已經證實咗呢支針可以 last for 6.5 年，宜家正做緊一個 10 年嘅 paper，如果都 pass 埋，咁打一次就可以預防將來 10 年啦！

結果左諗右諗，又諗起 blog 友舒莉嘅一句：與其幾千幾千咁開 facial course 扮靚，點解要慳呢 $3,000 唔買返個保障呢？再加埋男朋友嘅支持，最後又乖乖地拎咗將 credit card 出嚟，用 $2,950 比錢要咗呢 3 支針，expo join 仲送多次標準柏氏抹片檢查添。

一次過 book 晒 d 嘢，護士又嚇我話星期六 d booking 好 full，咁男朋友閒日又唔係咁得閒，咁不如約埋時間做婚前檢查 + 打第一支針，所以就即場約咗 4 月 25 日去搞掂！點解咁急？因為護士話婚前檢查最好係婚前半年至 9 個月做，而嗰 3 支預防子宮頸癌針就最好喺結婚前打晒，所以我 4 月打一支，5 月打第二支，10 月打埋第三支，11 月就可以成親啦！護士仲話當女士陀 BB 時會將自己嘅抗體分咗 d 比 BB，所以 highly recommend 我哋婚前打晒！就算打算結完婚 2 年先有 BB，都唔適宜太遲先打，因為越遲打，d 疫苗就越吸收得少，咁又要捱痛又 side 錢，唔建議！而且生完 BB 先打都唔建議，因為生過 BB 嘅女性患上子宮頸癌嘅風險又會高咗架啦！ 

返到屋企做吓 research，發覺價錢都 ok 平。網上面有人要用 $1,200-1,300 打一支，我 $2,950 就打晒 3 支，仲送一次柏氏抹片檢查，希望冇做咗水魚啦！

值得一讚嘅係佢哋 d staff 係勁勁勁 nice，一坐低有好多朱古力及軟糖招呼。仲有個註冊護士企喺隔離解答所有問題，個個都講得笑，男友仲同佢哋講咗好多有味笑話添！